Veci buteg

(Introduzione) Con questo testo sulle vecchie botteghe di Castello iniziamo la pubblicazione di alcuni scritti in dialetto che ci ha gentilmente inviato l’avvocato Lodovico Santandrea, castellano doc, oggi residente ad Imola. Preparati in occasione di ritrovi annuali fra gli amici di sempre, questi ricordi di “Aldvigh d’i Marièna” (dall’antichissimo soprannome della famiglia Santandrea) ci sembrano importanti perchè fissano un mondo scomparso che, seppur agli sgoccioli, resisteva ancora negli anni ’50 e ’60. Dai personaggi caratteristici ai giochi d’infanzia, dalle tremende goliardate ai vecchi negozi, gli scritti, a tratti nostalgici e a tratti spassosi, descrivono tantissimi particolari e dettagli, frutto di un’ottima memoria e di un profondo spirito di osservazione del bambino prima, e del ragazzo poi. Nel testo che segue rivivono i negozi che Aldvigh frequentava da bambino, pieni di odori, di loverie, non sempre dotati di ambienti salubri e puliti, a volte gestiti da personaggi molto particolari. E nel finale uno sguardo a due mestieri totalmente scomparsi: il maniscalco e il selcino. (A.S.)

Dal veci buteg d’Castel, queli c’al n’esest piò, amarcord i udur c’us sinteva quand t’intrèv e che par andè denter e bsugneva spess fè di scalè contra a bass.
Come quand t’andèv da Còia in te prè dla Filipèna che ui era una purtgina d’veder cun un campanèll atachè che suneva pr’avisè cl’intreva un queicadò e us faseva un scalè contra a bass. Denter us sinteva l’udòr dla roba d’porz armisclè cun quii dla drughereia e di zucarè, parchè Coia e vindeva toti cal baldarei cal pis ai burdèll, e a me piò tant un piaseva dal pepp ed zocher ross, che al srà gustedi un scud fra sè e nò, che dopa averli magnedi al laseva atorna a la bocca tott una barosla rossa.
La drughereia d’Pagnoca, invezi, l’era la piò furnida d’e paes, e quand t’intrèv us sinteva e prufom d’e zocher a vel insè cun quel dla ciculeta in polver e di candì che i feva bela mostra sora i ess denter ai ves d’veder cun tott chi culur, zall verd ross, chi faseva voia.
Dri d’e banch a sarvì la zent ui era Tinò d’Olga e cumèss, svelt come un usèll, Dino, e fiol, cun e coll tort e du occ chi pareva quii d’un vidèll quand ch’il porta a e mazell, e pù ui era lò, e patrò, Michel d’Pagnoca avstì d’negher instè e inveren, cun e curpètt negher, la camisa bianca senza cravata, e capèll negher pighè sora un’urecia e i cavell e i befi biench come la nev. E deva una gran suggeziò, mo mè an aveva paura parchè ai andeva semper cun al mi zei ch’agli era sarvidi e riveridi.
D’tott etra fata l’era la butega d’i Baztò, in te mezz dla piaza, la manch furnida, cun e bancò d’legn e veder quesi mezz vut, tant che andènd a Feza l’era un ches no avdè Cecchino che o l’andeva a fè spesa o e turneva cun al pruvest. E t’al avedev da luntà, cun e grimbialò bartè che pidaleva sora una bicicletta negra da dona cla dgeva bsè trenta quaranta chilo e quand e turneva l’aveva sora e portapacchi, cl’era da dnenz, un sacch d’roba da mezz quintèl c’ul tneva sod cun una mà.
Dop a la guèra, propri dnenz a la butega, pr’agli eleziò i aveva mèss e pelch par i uradur e, e dgeva mi pè, che finì e cumezi Cecchino l’andèss fura cun la garnè a coier tott i sunfanè cl’aveva adruvè Giacomino d’Porr pr’apiè e zigher, tant che, finidi agli eleziò, us era fat la pruvesta pr’apiè la stova tott l’inveren.
E dopmazdè, dop magnè, acumpagneva mi mè in farmazeia e, menter che li la miteva a post al midgen arivedi da Feza cun e pacch, l’am laseva in te spazi d’Sgalaberni, parchè a cl’ora Gino l’era andè a cà a magnè e e laseva Gianni a fè la guergia a l’esercezi.
La butega l’era una lisagna longa e streta, cun e bancò longh quesi eter tant, tott pì d’marcanzeia, sora e denter i cassètt, e cun i scafel pì instichì che ancora adèss am cmand cum che i fasèss a savè cus ch’i aveva e dov che foss la roba.
Mè um srebb piasù andè a snaslè drì d’e banch, mo Gianni l’aveva d’i urden prezis e un m’ha mai fatt muntè sora la pedana d’legn.
Da cl’ora l’onica clienta cl’intreva l’era Stelina, la mama d’Carcamo, cl’avneva a fess rimpì e fiasch e amarcord che quand che Gianni ul rimpeva, l’era un vinazz merz che fileva e che feva un fiè cl’arngheva.
E spazi d’Emma piò che una butega e pareva una caverna. Us feva òn o dù gradè contra a bass e pù us intreva in sta butghina cl’aveva e paviment in tera batuda, una lampadena atacheda a e suffett cla feva una lus da camra murtoria e, sobit, us sinteva l’udor de tabacch armisclè a quell dl’umiditè.
Lì l’era un dunò cla steva semper insdè sora un banzulè e me an l’ho mai vesta livèss sò par sarvì la zent e incora adèss an capèss come cla putess fè, nench se alora i piò tent i andeva a cumprè dò o trè naziuneli o alfa che al s’vindeva denter a di sachitè d’cherta.
Poch luntà, in te pont piò bass dia Fonda ui era e forèn d’Pavlò, una parola ogni tre biastemm, la butega ch’amarcord piò invluntira parchè al specialitè cl’aveva agli era un belsum. Nench’acquè us feva un scalè contra a bass e us intreva int una butega pzena mo dov ch’ui era dal specialitè da fè d’e mond, come la brazadela dolza con l’uvetta in mezz e e zocher sora, e pà cumò fatt a erch, i brazadèll da la cros, i piò bò d’tott Castell, i panè da l’oli fatt a triangul, che in cà meia i i cumpreva par mi zei Pirì, mo quand ch’ai paseva avsè ai magneva la ponta e amarcord incora che a tevla mi zei e mutleva mo al mi zei a mal difindeva: “L’è sol un babì”.
Ma la specialitè d’Pavlò, cl’era l’onich a fela in tott e mond, l’era la brazadela d’Sant’Ambò, una brazadlina saleda che s’ai pens un vè i guzlò ai occ.
Zerta che incù ui srebbe stè di problema cun l’igiene, parchè al dò bocch de foren agli era in t’e negozi duv ch’ui era la vendita, cun apugiedi in tera al fascèn dla legna e Bruno, e garzò, l’aveva semper e stronz in bocca e dò dida d’lozz negher sora al mà.
Nench s’in aveva butega a voi pù arcurdè Guidi, che freva i cavèll int la cuntrè dla Marchina, propri dnenz a l’ustareia, e totta la su atrezzatura l’era un’anèla d’fer atacheda a e mur par lighè al besci e una cadinela d’fer dov che miteva i ferr par fardei dopo che ui aveva infughì.
E pù ui era Sintula, e salghì, che um pè d’avdel incora adèss cun e grimbialò d’sola, acquacè in tera cun la mocia di sèss alè avsè cui pianteva on dacant a cl’eter cl’era un artesta in t’e sù lavòr, parchè quand cl’aveva finì al strè o al piazz u si zireva less come sui foss l’asfelt.
Veci buteg e vecc artigiè d’un Castèll cun esest piò se non int la nostra mimoria e che cun quèll d’adess l’ha sol in cumò cun si dscorr in itaglià: parchè una volta us sinteva dscorrer sol in dialètt, menter che adèss us sent dscorrer sol in albanes.

Trasimeno 25 April d’e dodg
Aldvigh d’i Marièna

Contributo originale per “La storia di Castel Bolognese”.
Per citare questo articolo:
Lodovico Santandrea, Veci buteg, in https://www.castelbolognese.org

Lascia un commento

Il tuo indirizzo email non sarà pubblicato.