Persunegg

(Introduzione) Con questi due testi di Lodovico Santandrea (Aldvìgh d’i Marièna) scritti nel 2016 e nel 2018 e qui riuniti per la pubblicazione sul web, riscopriamo alcuni “persunegg” castellani più o meno noti.
Nei decenni addietro Castel Bolognese pullulava di personaggi “originali” e macchiette, tutti rigorosamente “marchiati” con uno o più soprannomi dialettali (e spesso di loro si ignorava persino il vero nome), protagonisti di tanti scritti di Giovanni Bagnaresi, Francesco Serantini e Ubaldo Galli. Alcuni hanno fatto davvero epoca. Progressivamente il nostro paese li ha persi tutti o quasi, perdendo anche gran parte della sua anima.
Aldvìgh ci narra alcuni aneddoti dell’ultima generazione di questi “personaggi”. Si parte dal mite Palì postino, amico inseparabile di Angelo Biancini (e vittima di tanti suoi scherzi) al punto che tanti lo consideravano il suo segretario ed era divenuto noto anche alla grandi firme della carta stampata (Dario Zanasi scrisse di lui sul Il Resto del Carlino: “l’austero e proverbioso Palì, il postino di Castello”). E dopo aver raccontato uno spassoso aneddoto su Angelo Biancini, Aldvìgh descrive le burle pesantissime di cui era protagonista, a volte autore, spesso vittima, “E Falignam”: fatti e parole irripetibili (in tutti i sensi), da denuncia penale al giorno d’oggi, ma che all’epoca erano la quasi normalità nel Bar Commercio. E naturalmente al Commercio non poteva mancare il calcio, protagonista non solo di alcuni tormentoni ideati da Palì, ma anche di tanti coniati da Ricagni, juventino incallito, che inventava anche tanti soprannomi da affibbiare ai calciatori famosi. La carrellata continua con Feliz d’Burgagnò, macellaio dalla lingua tagliente come uno dei suoi migliori coltelli. Infine un omaggio a Ubaldo Galli, che Aldvìgh ha avuto il privilegio di avere come amico e di sentirlo recitare, rigorosamente al bar, tante poesie e raccontare fatti divertenti di cui era stato protagonista.
E dopo tanto ridere per le stramberie dei “persunegg” e per i fatti raccontanti da Ubaldo, un finale venato di malinconia, con l’uscita di scena del grande dicitore Ubaldo, che in uno degli ultimi incontri con Aldvìgh si inceppa mentre recita, a richiesta, una poesia di Ferlini e scappa a casa. Lodovico lì per lì rimane male e si sente in colpa, ma poi si perdona perché si rende conto di aver assistito all’ultima recita di un Personaggio (questa volta con la P maiuscola) irripetibile. (A.S.)

Arfasendess a un dett di vecc di noster vecc e cambiend i nò a Fani ui piaseva dì che “Se passi da Castello e non sei intervistato o che Richì è morto o che Gasparì è malato”.
Quest par dì che, fena a la generaziò prema dia nostra a Castell ui è stè di persunegg ch’i ha fatt epoca e a voi arcurdem queicadò ch’a i è cnusù tott.

PALI’ PUSTE’

Un gnè stè una parsona piò pacefica d’Palì Pustè, mo una volta che Sconza ui amanchè d’rispett u si piantè dadnenz e pù, senza dì né tant e né quant, ui dasè un pifett in t’e nes c’ul fè sangunè.
Lo pu l’era famos pri su dett, come quand che dgeva che i faintè c’ui è a Fenza in è in t’inciona etra pert d’e mond, o che i franzis i è i faintè d’Europa e quand che sinteva Turò che faseva la murel a queicadò ul feva stè zett dgendi “Torrione non fare l’ocarone”.
In t’e furnè, quand c’ui era al partid, l’eva e su post in prema fila parchè cun e dì l’aveva da direzer la musica dl’eurovisiò.
Una volta cl’avdè l’ela andè cun e palò vers a la bangirina de corner e cminzè a dì “Us insaca, us insaca” e da alora tott al volt che un zugador l’andeva cun la pala vers a la bangirina, tott i dgeva: “us insaca”
De santott, pù, l’era tott cuntent parchè l’era andè in pinsiò e finalment us puteva guardè par televisiò totti agli Olimpiadi d’Città del Messico, mo cl’ann l’Itaglia l’andeva poc bè e quand a vinzessum la prema mdaia d’or in te canutagg con Baran e Sambo, timoniere Cipolla, e saltè fura cun un eter di su dett: “Ai è sbuzzè l’ass”.
Mo piò d’tott l’è avanzè in tla storia e su sudalezi cun e Prufesor.
Quand i era fura a magnè e usn’adeva che Palì l’era pasè d’là cun e bè, Anzulè l’insisteva par fei bè una grapa, parchè, e dgeva, “Un grapè l’è quel cui vò” e l’arsposta. puntuela, l’era “T’e rasò, la grapa i l’adrova da sbariaghes”.
Se zuzideva la dmenga sera ch’us foss intavanè, alora l’andeva a e cino: e trampaleva so pr’al schei, us faseva strapè e bigliett da Tina d’Laciarita e pù l’intreva denter e us indurminteva e acsè e tucheva a Picaia andel a distè quand che e cino l’era finì.
Mo piò d’tott l’è famos e fatt d’cla sera che e Prufesor e fè purtè una fiamenga d’fasul e e cminzè a insester cun Palì par feien magnè un piatt, nench se lò us tireva indrì, parchè e dgeva chi i arebb dè fastigi, mo alla fè ui tuchè d’magnei. La matena dop, quand ch’is livè, Pali, l’era bianch come una peza laveda e, quand ul avdè, Anzulè, seri, mo ridend sota ai befì, ui cmandè: “C’set fat” e quand lò l’arspundè “Sta bò, i fasul, i m’ha dè fastigi, a so stè mel tota not” e Prufesor e cumentè: “Purè at l’aveva dett me t’an i magness”.

A PRUPOSIT D’E PRUFESOR

Una sera, vers mezanott, l’andè a sunè a cà d’Nino, e su autesta, e quand che lò, dop avè tirat so e teater di buratè, us fè a la finestra, ui dgè: “Ven zò sobit ch’ai ho d’andè a Napoli”.
Par tott e viazz un dscurè quesi mai e Nino e capè sol cl’aveva bsogn asolutament d’avdè una parsona pr’un aferi impurtantessum.
La matèna dop i arivè a Napoli cl’era quesi agli ott e quand i sunè a cà d’stù la vens a arvì la moi cla dgè che e su omen l’era andè fena a fè claziò e a cumprè e giurnel, temp dis minut un quert d’ora e e srebb turnè a cà.
Alora e Prufesor e cminzè a scusè la testa e pù, arvulzendes a Nino, ui dgè: “Mo, mo, mo, mo an ho miga de temp da perder, monta pù sò in machina c’as turnè a cà”.

E FALIGNAM

Sl’avèss truvè clù cl’aveva invintè la voia d’lavurè e Falignam ui avrebb dè un gran bussadur. Lò infatti se a Casarelta us feva un taiulè in t’un dì, us miteva in malateia e pù, a cà, e cminzeva a butei sora d’e sel acsè pr’un sbuzò l’era bò d’stè in malateia du o tri mis tant che Rumanè, che pr’i soranò l’è semper stè l’ass d’brescla, ul ciameva Tunio o Reale Mutua.
Una volta al donn an s’azardeva a intrè in t’i cafè, mo se capiteva e ui era in zir e Falignam e zarcheva toti al scus par tirè fura l’usell. E una sera, c’ui era una frustira cl’a ni badeva, e cminzè a sbater quel che lò e ciameva e col d’oca sora la spalira d’na scarana mo stì, guardendel cun cumpassiò, la cumentè: “Cs’ela, un cambra d’aria?” e lo ui avanzè acsè mel c’ui tuchè d’insache i viulè.
Quand pu ui era in zir di schirz t’pu ste tranqvel che lò ui ciapeva semper d’mezz, come cla sera ch’iera a pischè in t’e padlò e lò us era imbariaghè. Cun la scusa d’fei pasè la topa i i fè un scherz a la rumagnola, on d’chi schirz da lasei la gabana: il butè zò in t’e canel e pu il pischè cun la rè e quand il tirè sò lo l’amuleva dal biastemm e di chencher pez che Sassinètt, e alora i cminzè a tirel so e zò che, se foss sfulghè fura da la rè, in cal cundiziò us srebb anghè.
Quand che fò ora d’turnè a cà il carghè denter a e baul d’na machina insè cun un sacc ed pess e par tott e viazz fena a Castell la Smania us divartè a tampunè la macchina e acsè e dsgraziè è ciapè una gran scarabutleda.
Quand i arivè in piaza e i arvè e baul, lò e saltè fura che puzeva come un arenga cun un biastmò da campiunet d’e mond e e tirè e sachett d’e pess contra a e mur sota a la finestra de biglierd che la macia la i’è avanza par enn e enn.
Mo quell che descriv mei e persunagg l’è e dialog cl’avett un dopmezdè d’instè quand che Gianluigi l’arivè dnenz a e bar in calzunzè curt e cun una maitina adereta: Gianni l’è semper stè un atleta e e Falignam quand c’ul avdè ui dgè: “Gianaza, s’ai avess e tu fisic a ciavarebb la mitè dal donn” e sobit l’arivè l’arsposta da inzignir: “E l’altra metà?” “A l’incularebb”.

Ventzencq abril de sedg
Aldvigh d’i Marièna


Par ciumpì la galareia di persunegg d’Castèl a voi arcurdè incora:

RICAGNI

E soranom u gli aveva mèss Fani parchè t’i enn cinquanta l’era avnù a zughè tla Juventus da l’Arzintena una mezz’ela sinestra ch’us ciameva acsè.
Richì l’è stè on di piò grend tifus dia Juve ch’a i eva cnusù, tant che um aveva lassè un’arditè, parchè um dgeva semper: “Te t’avdirè la terza stela”. Lo d’palò un capeva gnint, mo par dè e soranom a zugadur e alenadur l’è stè l’ass d’brescla.
Iuliano ul ciameva Totonno, a Fedele, e terzè sinester de Bulogna, ui dgeva Fidel d’Ariol e Heriberto Herrera u l’aveva batzè E Pinguino.
A Bulgarelli ui dgeva Iacmì, e pù l’azunzeva “Quand l’entra in area Iacmì e fa e tuffett e i i dà e rigore”. Un dopmezdè ch’ui era in te sgond canel una partida d’copa e e Bulogna l’era in ritir a Palazol dov che e sgond canel un s’avdeva, i zugadur i vens a vdè la partida t’e furné e quand un zugador e caschè in area Richì, cl’era in sdè avsè a Bulgarelli, e cummentè “L’ha fatt e tuffett come Iacmì”.
Quand pu una squedra bona la vinzeva cun una squadreta e cuminteva “Bela roba, l’ha batù e Piceno”.
Quand i terzè i cminzè a andè in avanti lo e tuleva in zir gl’interesta e l’inventè “Facchetto all’attacco” e ui stuzigheva in cuntinuaziò, cumpresa la partida cun e Liverpul e, toti al volt che dgeva “Facchetto all’attacco”, Mamini e supieva come un tor, mo quand Facchetti e signè e gol dla qualificaziò Mamini us livè in pi, e tulè so la lata da ventzenq chilo d’e cafè e pu, rugend “Facchetto all’attacco” u la tirè adoss a Ricagni che, nench se l’era insdè, u l’arbutè.
Rijcard ul ciameva spudacc parchè ai campiunet d’e mond l’aveva spudè in faza a Voeller, d’Baresi e dgeva che quand u s’è fatt superè par tiret zò l’adruveva e rinzett e d’Baggio e cuminteva che e prinzepia a signè sol dop che ch’iter i à cavè e dusett a la bott, parchè “lò l’ha du marunzì cumpagna quii d’e gatt pozzel”. Kholer invezi ul ciameva Bafièt e un ann che Van Basten e signeva un gol o dù toti al dmengh, a la vzeglia d’un Milan-Juventus e dgè “Se dmenga ul merca Bafiet lò us scorda d’fè gol”: difatti la partida la finè zero a zero.
Quand a vinzesma i mundiel d’l utantadò in naziunela ui era quesi tott juventè e l’ann dop i arivè Boniek e Platini e Ricagni l’era sicur ch’un sarvess gnanca l’alenadòr, tant che dgeva che basta che i zugadur i vega in camp allo stato brado.
Sacchi ul ciameva “E patachì d’Fusgnà” e invezi Maifredi u l’aveva batzè “Dom Perignon” e l’ann cl’avnè a la Juve i i aveva cumprè una muntagna d’zugadur. E campiunet l’aveva trentaquater partid cun la vitoria a du pont mo Richì e prunusticheva: “Cun Dom Perignon a fè utanta, nuvanta pont quel e fò on di puch campiunet che la Juventus l’an vinzè gnint e l’avanzè fura da toti al copp.
Mo la su gran pasiò l’è stè Sivurì che lò ul ciameva Lusartè e quand che la dmenga sera e guardeva la sintesi dal partid, se vdeva un gol o un tunnel d’Sivurì l’andeva zò d’testa e e cminzeva a rugiè “Lusartè, tric trac, sgnic sgnac”: e turneva un burdèll.

FELIZ D’BURGAGNO’

Feliz d’Burgagnò l’aveva una lengua cla taieva e ferr e guai andei atoren che e feva come la zghela, che st’ai tocch e cul l’as mett a cantè.
Ona dal su vettim preferidi l’era e Falignam e una volta che lo ul stuzigheva ul lassè dscorer, l’aspitè che atoren us foss radunè un bel branchett d’zent, pu, in un mument d’silezi, us mitè un dì dnenz a e nes e pù l’abassè al do dida avseni. In t’l’imbarazz generel us fè un silezi c’un sinteva un zett.
In un’etra uccasiò e Falignam l’intrè t’e bar cl’era in gas e, avded Felice apugè a e banch, e dgè “T’la vita a n’ò fatt d’tott i culor, um amanca sol d’inculè un mazler”. Feliciano un dgè né tant e né quant, us tirè zò i brago, us mitè a nuvanta gred e pu ui fè: “Pronti”.
Un etra volta l’era Supremo ch’ul stuzigheva e lò zett, ul laseva dscorerr e intant tott atoren us arduseva semper piò zent. Quand e fò sicur che tott il sinteva Felice e dgè: “dì so, la tu Nella l’al incora che neo acquè?” e pù e fè segn a l’interen d’na cossa.
Us fè un silenzi imbarazzant, chi c’struscieva i pì in tera chi c’faseva cont d’tusì par no fes avdè che l’era drì a sgrignè. Insomma una scena tepica da Bar Cumerzi d’na volta.

UBALDO

Tra l’vecc famei d’Castèl as sé semper avrù bè neca fra una generaziò e cl’etra e Ubaldo par me l’ha semper avù una simpateia particulera, tant che t’i ultum enn um mandeva i su raccont e al su puisei da bater a machina.
Me pù, se un argument um interessa, a so un bon ascultador e a so neca un pruvucador in te sens bò dia parola.
Un ann in premavira, a feva l’univarsitè e al tre andeva a cà a stugiè, ai avegna una spezi d’apuntament: vers al do e mèzz am miteva insdè int una scarana fura da e bar e Ubaldo l’avneva a tò e cafè, e me alora a l’aspiteva, lov d’sintil cuntè.
I fatt ch’im piaseva piò d’tott i era tri e ogni tant, fasend cont d’resem scurdè, a dgeva: “E quella volta…”, l’era come invidè un tudesch a bè e lò e cminzeva a cuntè.
E prem l’era un gol de Bulogna (se l’avess fatt e giurnalesta spurtiv e srebb ste un campiò): alora e cunteva cl’era a e Lituriel, i noster vecc i l’ha semper ciamè acsè, e un zugador de Bulogna e farmè e palò pr’aria a mezz camp, pu senza fei tuchè tera l’arivè a e lemit dl’area e quand e purtir e dè fura ui fè pasè la pala sora la testa e l’intrè in porta cun e palò. Deta acsè l’an fa efett, ma cunteda da lò ut pareva d’esser in tribona.
Cl’eter fatt l’era una manifestaziò d’puiseia dialettela a Mantova dov ch’ui era vent poeta, on par ogni regiò e par la Rumagna un i puteva esser che Ubaldo che e rezitè “Da la Zabariona”.
Quand l’avett finì u si avsinè e friulà e e napuletà par strichei la mà, dgend che in aveva capì una parola ma i s’era cummoss.
Mo piò d’tott um piaseva e fatt d'”e adess amazum”. E Castèl l’era stè surtegiè pr’una partida d’Coppa Italia cun e Pedva che e zugheva in seria A e, par la difarenza d’categureia, e parteva cun e vantazz d’tre a zero. Ubaldo um cunteva d’la parteza la matena a e bur sora e legn dur d’la terza class, mo quel c’um piaseva piò d’tott l’era la descriziò dl’intreda in camp dov che i ong zugador de Castèl is presentè ognò cun una bocia d’aibana dla Sera cun una fiama rosseblu e un brazadèl da la cros d’Stuvanè infilè te col dla bocia: quand e descriveva i sbatimà de poblich ut faseva avnì la pel d’oca.
Par quesi tott e prem temp la partida l’avanzè se zero a zero e vers a la fè de temp Levratto (soprannome di Budini II, ndr) us truvè da par lò dnenz a e purtir, ul scartè e pù a porta vuta e chilzè fura. Levratto e zugheva a l’ela sinestra e Ubaldo l’era e terzè dester: Levratto e travarsè tott e camp, us butè in znocc dnenz a Ubaldo e pù e dgè “e adess amazum”.
Quand l’aveva passè l’utantena Lelo um cuntè che u l’aveva cunvent a smetter d’andè a rezitè dgendi cl’era mei cu s’artiress in bleza, mo un dopmezdè d’instè ch’a segna fura da e bar an fò bon d’tratnim e al pruvuchè un etra volta cmandend: “E quella poesia di Ferlini su Castello?”.
U gn’avrett eter, e cminzè a rezitè e un s’afarmeva piò, tant che tott atoren us era fatt un grand uditori cun tott che i steva in silezi piò che in cisa.
Sol che a mitè d’una puiseia us bluchè, e scusè la testa, e e cumintè “An m’arcord piò” e pu us livè so e l’andè a cà.
Ecco, lè par lè ai avanzè mel e am sintè in colpa, mo savend che a so stè l’ultum cu l’ha sintù rezitè al su puisei a mla pardon.

ALDVIGH D’I MARIENA
Milà Maretma ventzenq d’abril de zdott

Contributo originale per “La storia di Castel Bolognese”.
Per citare questo articolo:
Lodovico Santandrea, Persunegg, in https://www.castelbolognese.org

Lascia un commento

Il tuo indirizzo email non sarà pubblicato. I campi obbligatori sono contrassegnati *